لطيب فرصه والجمايل توافيق

لطيب فرصه والجمايل توافيق
ومن لا توفق ماكتب له جماله
ومن لا رقى للطيب روس الشواهيق
مازان له وقته على مابداله
ومادام لفعول الجمايل عشاشيق
كسب الجمايل مايجي بالسهاله
ولو انها تشرب مع فكة الريق
كلن خذاله كل ما أصبح بياله
والطيب منوه للقلوب المشافيق
كلن يتوق ومنوته راس ماله
والمدح مايزهي على الرجل ويليق
الا لا صارت وافيات خصاله
يستاهله رجلن يفك المزانيق
اللي يقال ونعم لا جا مجاله
ومن ساقته نفسه وهو مابعد سيق
لأجل الجميل يزين الله فاله
والمرجله ماهي بتحتاج تنسيق
من بين قلب اللي عشقها وباله
ومن عادة الدنيا تخون المواثيق
تفتر مكرتها سوات المحاله
ولولا اللوازم ماعرفنا المخاليق
مانعرف الرجال لين انعناله
والكفؤ تظهر فزعته حزة الضيق
وينشاف في الشده بعين العداله
نسل الرجال متعبين الملاحيق
متوسطن من بين عمه وخاله
واللي يطيق ولابغى قال ما أطيق
تحرم عليه المرجله والشكاله
والهينه تكبر على اللاش والهيق
له في الرخا قاله وفي الضيق قاله
والطيب شاره والضماير صناديق
واللاش طيبه ما تعدى ظلاله
وأنا أسبر قلوب الرجال المغاليق
والصامت أقطع غايته من مقاله
ومادام في الدنيا رجال ومطاليق
نصيتهم واللاش مالي وماله

كفو يالشيخه وانتى يالاستاذه شموخ نجد محل للطيب والنخوة ولا فيك حيلة وأنتى كا الصقر الحر سكناك بعالى الشواهيق ولك السبق بفك المزانيق ؟؟؟ وانتى ام الجمايل وفالك السعاده والهناء والعفو والعافيه

لطيب فرصه والجمايل توافيق
ومن لا توفق ماكتب له جماله

والله قصيده قويه ومعبره تسلمين ياشموخ نجد

صح صح لسان الشاعر قصيده جزله وتستاهل المليون

مشكوره شموخ نجد

صح لسان الشاعر او الشاعره
بصراحه كلام ابداع في معنا الكلمه

مافيه اروع من هالابيات صح لسان الشاعر

وماقصرتي ياشموخ نجد

تشكرين ياشموخ نجد على الاختيار الراقي وهذا يدل على الذوق الرفيع

تسلمين ياشموخ قصيده معبره وكافيه وافيه